Búgingi rubrikamız arqalı, “Tanka” filmindegi kishipeyilligi menen xalqımızdıń júrek tórinen orın alġan aktyor Quwatbay Ábdireymov haqqında sóz etemiz.
Quwatbay Ábdireymov – 1937-jıl, 24-may sánesinde dúnyaġa kelgen.
Qaraqalpaqstannıń tolıq huqıqlı, Ózbekstan SSR xalıq artisti hám qaraqalpaq aktyorı, rejissyor. Ózbekstan xalıq artisti. Berdaq atındaǵı mámleketlik sıylıqtiń laureatı, ” El-jurt húrmeti” ordeni iyesi. Ol Tashkent teatr hám súwretshilik institutına oqıwġa kirip, 1963-jılı tamamlaǵan hám usı jılı Stanislavskiy atındaġı qaraqalpaq teatrı truppasına qabıl etilip, bir jıl dawamında ol jerde jumıs islegen. Sonday-aq, Qaraqalpaq televideniyesinde rejissyor (1963—1968), bas rejissyor (1968—1971), Qaraqalpaq teatrında direktor hám bas rejissyor (1973—1979).
Q.Ábdireymov saxnalastırǵan spektakller: „Otello“, „Ana jer“ (Ch. Aytmatov), „Abu Rayxan Beruniy“ (T. Seytjanov), „Berdaq“ (J. Aymurzayev), „Bilmey bastım sheńgeldi“ (I. Sultan ), “Temir hayal” (Sh. Boshbekov), „Ernazar alakóz“ (A. Ótaliyev).
Filmlerde atqarġan rolleri
Quwatbay Ábdireymov 1959-jıl – “Bes dos”, 1960-jıl – “Hamza”, 1967-jıl – “Moskva arqamızda”, 1968-jıl – “Jazdıń ortalarında qar”, 1974-jıl – “Komsomolshılar ketti”, 1977-jıl”Aqqus”, 1979-jıl – “Aliy baba hám qırq qaraqshı” hám 2002-jıl – “Tanka” filmlerinde ózine tapsırılġan rollerdi kámine keltirip, tabıslı atqarġan.
Sonday-aq, ol “Ózbekfilm” hám „Qazaqfilm“ kinostudiyalarında da 20 dan artıq filmlerde súwretke túsken: Aliyjan („Hamza“), Ergash („Ákeler wásiyatı“), Valiyjan („Ańızdaǵı qız“), Zaripbay („Boysınbas“).
Marhum Q.Ábdireymovtıń filmlerde oynaġan rolleri, búgingi kúnge shekem xalqımız qálbinde jasap kelmekte.
Tayarlaġan: “Qaraqalpaqfilm” kinostudiyası málimleme xızmeti