Xabarıńız bar, jaqın arada «Qaraqalpaqfilm»MM tárepinen jańa tariyxıy film — «Gúlayım hám Qırq qız» kartinasınıń súwretke alıw jumısları baslanadı.
Usı úlken joybardı joqarı sapada ámelge asırıw maqsetinde «Qaraqalpaqfilm»MM direktorı Ikram Abdikalikov hám bir qatar dóretiwshilik jámáát aġzaları Qazaqstan Respublikası Almatı qalasına dóretiwshilik sapar menen atlandı.
Saparı dawamında film ushın eń qolaylı lokaciya orınları kórilip, tariyxıy waqıyalarǵa sáykes keletuǵın tábiiy hám eski orınlar úyrenilmekte. Bul jumıslar filmniń kórkemlik dárejesin arttırıw hám tamashagóyge tariyxıy ortalıqtı
sezindiriw ushın áhmiyetli esaplanadı.
«Gúlayım hám Qırq qız» filmi qaraqalpaq xalqınıń bay tariyxı, batırlıq dástanları hám milliy miyrasın keń kólemde sáwlelendiriwdi maqset etken.