Búgingi rubrikamız arqalı, “Tanka” filmindegi tákirarlanbas roli menen xalqımızdıń júrek tórinen orın alġan, Ózbekstan hám Qaraqalpaqstan xalıq artisti marhum Shamurat Ótemuratov haqqında sóz etemiz.
Marhum Shamurat Ótemuratov 1929-jıl, 1-iyun kúni Taxtakópir rayonında dúnyaġa kelgen. Ol Qaraqalpaq xalqınıń ardaqlı aktyorı edi. Aktyor 1955-jılı Tashkent teatr hám súwretshilik kórkem-óneri institutın tamamlaġan hám sol jıldan baslap, Qaraqalpaq mámleketlik muzikalı teatrında aktyor bolıp óz dóretiwshiligin baslaġan. Sh.Ótemuratov, tiykarınan komik roller ustası sıpatında xalıqqa tanılġan. Bunı biz, Sattor (J.Aymurzaev, “Rawshan”), Xan (Sh.Xusayinov, “Aldar kóse”), Elbrus (G.Xugaev, K.Pliyev, “Hayalımnıń kúyewi”), Sudya (G.Gorin, “Atı óshsin”), Doshum “S.Xojaniyazov, “Súymegenge súykenbe”) sıyaqlı obrazlarda hám bárshemizge birdey belgili, súyip tamashalaytuġın “Tanka” filminde de ayqın kóre alamız. Ótkir xarakterli hám múlayım kúlki oyatıwshı roller menen bir qatarda tereń dramatikalıq obrazları (Kelin”de Dárimbet, “Jaralanġan júrekler”de Sapar ata hám basqalar) menen de tamashagóyler júreginen tereń orın iyelegen.
Sonday-aq, ol Qaraqalpaqstan radiosında beriletuġın “Tikenek” satiralıq jurnalınıń hám televideniyede teleminatyuralardıń tiykarın salıwshılardıń biri bolġan.
Onıń Qaraqalpaq kórkem óneriniń rawajlanıwına qosqan úlesleri óz waqtında bahalanıp barılġan. Oġan 1957-jılı Qaraqalpaqstan Respublikasına xızmet kórsetken artist, 1963-jılı Qaraqalpaqstan xalıq artisti, 1977-jılı Ózbekstan xalıq artisti húrmetli ataqları berilgen bolsa, 1986-jılı Berdaq atındaġı mámleketlik sıylıqtıń laureatı hám bir qatar húrmet jarlıqlar menen xoshametlengen.
Marhum Sh.Ótemuratov búgingi kúnge shekem, “Tanka” filmindegi tákirarlanbas roli menen xalqımızdıń júrek tórinde máńgi jasap kelmekte.
🗄Tayarlaġan: “Qaraqalpaqfilm” kinostudiyası málimleme xızmeti