Búgin biz Ózbekstan Respublikasına xızmet kórsetken artist, Qaraqalpaqstan Respublikası xalıq artisti, Berdaq atındaǵı Qaraqalpaq mámleketlik akademiyalıq muzıkalı teatrı vokal artisti Ómirbay Qosımbetov Sársenbaevichtiń ómiri hám dóretiwshiligi haqqında sóz etemiz.
Tájriybeli aktyor Ó.Qosımbetov 1963-jılı 21-aprel sánesinde Qaraózek rayonı “Qaraózek APJ”da dúnyaġa kelgen. Milleti qaraqalpaq, Qaramoyın-annaxoja ruwınan.
Aktyor óz awılındaġı házirgi Arzıwov atındaġı orta mektepti tabıslı tamamlaġan. Ómirbay Qosımbetov balalıġınan kórkem óner hám mádeniyat tarawına qızıġıwshıġı joqarı bolıp, Tashkent mámleketlik teatr hám súwretshilik institutına oqıwġa tapsıradı hám 1985-jılı tabıslı tamamlap, teatrda aktyorlıq sheberligi menen jumıs baslaydı. Kóplegen spektakl hám filmlerde ózine júkletilgen rollerdi kámine keltirip atqarıp, 1996-jılı Ózbekstan Respublikasına xızmet kórsetken artist, 2000-jılı Qaraqalpaqstan Respublikası xalıq artisti sıyaqlı húrmetli ataqlar menen xoshametlengen.
Ulıwma miynet iskerligi 32 jıl hám joqarı maġlıwmatlı. 2008-jılı Ózbekstan mámleketlik kórkem óner hám mádeniyat institutı Nókis filialı ashılıwı múnásibeti menen, usı instituttıń direktorı lawazımında 2013-jılġa shekem nátiyjeli jumıs islegen.
Ó.Qosımbetov dóretiwshilik miynet jolı dawamında 50den artıq túrli xarakterdegi rollerdi atqarġan. Ol keń diapazonǵa iye aktyor bolıwı menen birge, tamashagóyler arasında komediya aktyorı retinde de belgili bolıp, búgingi kúnde xalqımızdıń ardaqlı dóretiwshisine aylandı.
Sonday-aq, aktyor «Qaraqalpaqfilm» kinostudiyası tárepinen súwretke alınǵan “Kurort”, “Urı”, “Bir dostıń bolsın”, “Ájiniyaz” filmlerinde de tabıslı rol atqarġan.
Respublika kóleminde ótkeriletuǵın Ǵárezsizlik, Nawrız hám basqa da bayram tamashalarında belsendi qatnasıp kelmekte. Sonıń menen birge 1992-2000-jılları Tashkent qalasında ótkerilgen Qaraqalpaqstan Respublikası mádeniyat hám kórkem óner kúnlerinde, 1990-2001-jılları Xorezm wálayatında ótkerilgen Qaraqalpaqstan Respublikası mádeniyatı hám kórkem óneri kúnleri ilajlarınıń qatnasıwshısı. 1995-jılı Yunesko qararı menen Ulıġbek babamızdıń 600 jıllıq yubileyine baġıshlanġan Angliya, Franciya mámleketlerinde konferenciyada, 2001-jılı Hindistanda mádeniyat orayınıń dúzilgenine 50 jıl tolıwı menen ótkerilgen anjuman qatnasıwshısı.
2013-jılı Tashkent qalasında teatr jámááti menen gastrol saparda bolıp, «Alpamıs», «Kelin» spektakllerinde rol atqarıp,
2014-jıl juwmaġı boyınsha Tashkent qalasında ótkerilgen,«Xoshamet-2014» tańlawında «Jıldıń eń jaqsı erkek roli» nominaciyası menen sıylıqlanġan.
2015-jıl iyun ayında M.Nızanovtıń «Poshsha» spektaklinde Ómirbay,
2016-jıl may ayında Tashkent qalası A.Nawayı atındaǵı Ózbekstan mámleketlik Akademiyalıq úlken teatrında «Ájiniyaz», «Tumaris» operaları hám simfonik orkestri jámááti,
2017-jıl mart ayında K.Raxmanovtıń «Edige» muzıkalı spektaklında Toxtamıs patsha, 2017-jıl noyabr ayında Buxara wálayatında, 2018-jıl fevral ayında Tashkent qalasında gastrol saparlarda bolıp, ilajlardıń joqarı dárejede ótiwinde óziniń salmaqlı úlesin qosqan.
Ó.Qosımbetov búgingi kúnge shekem mámleketimiz boylap tez-tez dóretiwshilik saparlarda bolıp kelmekte hám oqıwshı hám student jaslar menen de ushrasıw keshelerin shólkemlestirip turadı.
Ómirbay Qosımbetov búgingi kúnde Nókis qalası turġını. Elimizdegi eń úlgili shańaraqlardıń biri hám ómirlik joldası menen birge 1 ul, 4 qız, 13 aqlıqtıń ádiwli ata-ájesi bolıp, perzentlerin Watansúyiwshilik ruwxında tárbiyalamaqta.
🗄Tayarlaġan: “Qaraqalpaqfilm” kinostudiyası málimleme xızmeti