Búgin, Qaraqalpaqstan Respublikasına xızmet kórsetken artist, Qaraqalpaq mámleketlik jas tamashagóylar teatrı ustaz aktyorı Jigerbay Abdimov haqqında sóz etemiz.
Qaraqalpaq xalqınıń maqtanıshı, tájriybeli ustaz aktyor Jigerbay Abdimov 1956-jılı 2-yanvar sànesinde Nókis qalasında dúnyaġa kelgen. Milleti qaraqalpaq, Qosar-manġıt ruwınan. Ol mektep waqtınan baslap-aq, mádeniyat hám kórkem óner tarawına qızıġıwshılıġı ayrıqsha bolġan hám mektepti tamamlap, A.N.Ostrovskiy atındaġı Tashkent teatr hám súwretshilik kórkem óneri institutınıń “Drama hám kino aktyorı” bólimine oqıwġa kiredi hám 1977-jılı oqıwdı tabıslı tamamlap, sol jılı Stanislavskiy atındaġı mámleketlik teatr xor aktyorı bolıp óz jumısın baslaġan. Sonday-aq, 1978-jıldan baslap búgingi kúnge shekem Qaraqalpaq mámleketlik jas tamashagóyler teatrınıń pidayı aktyorı. Ótken jıllar dawamında respublikamız kólemindegi oġada kóplegen spektakllerde, filmlerde rol atqarıp ġana qoymastan, bayram saltanatlarınıń joqarı dárejede ótiwinde óziniń salmaqlı úlesin qosıp kelmekte. J.Abdimov xalqımızdıń júrek tórinen orın alıp, mámleketimiz tárepinen 2004-jılı “Qaraqalpaqstan Respublikasına xızmet kórsetken artist” eń húrmetli ataǵı hám 2014-jıl “Doslıq” ordeni menen sıylıqlanǵan.
Miynet jolı 47 jıl.
Teatrda atqarġan rolleri
J.Abdimov aktyorlıq iskerligi dawamında 100 den artıq obrazlar jaratqan. Atap aytqanda, K.Raxmanovtıń “Keshikken báhár” spektaklinde Tórebek, “Toǵız tońqıldaq bir sheńkildek” spektaklinde Xalmurat, “Hayal táǵdiri” spektaklinde Arzıxan Allaxanovich, “At aylanıp qazıġın…” spektaklinde qońsı, Ġofur Ǵulomnıń “Sum bala” spektaklinde Sum bala, B.Jakievtiń “Áke táǵdiri” spektaklinde Sopay, K.Galdonining “Eki bayġa bir malay” spektaklinde Doktor Lombardi, P.Tilegenovning “Duwtarlı soldat” spektaklinde Nemec oficeri Myuller, L.Tolstoydıń “Buratino” spektaklinde Karlo, Buratino hám Arlekin, A.Raxmatovtıń “Abdulla Nabiev” spektaklinde Saqshı ǵarrı, I.Lazutinniń “Balaǵa áke kerek” spektaklinde Igor, Sh.Peronıń “Etik kiygen pıshıq” spektaklinde Adamxor, Mingalimov hám Kryukovtıń “Sıyqırlanġan toġay” spektaklinde Ubir, Ya.Stelmaxtiń “Jas gvardiya haqqında oylar” spektaklinde Vanya, A. Xmeliktiń “Sh” operaciyası spektaklinde Laptev, V.Ziminniń “Aq jol” spektaklende Kalta, K.Karimovtıń “Altın teńge” spektaklinde Qaraqshı, J.Molerdiń “Skapenniń hiylesi” spektaklinde Argant, Rozimuxamedovtiń “Raxmet kapitan” spektaklinde Zafar, P.Aytmuratovtıń “Arzıwlar qanatında”spektaklinde Pirnazar, “Oynaqlaġan ot basar” spektaklinde Qayin ata, “Tuńġısh muxabbat” spektaklinda Bekpolat, “Súyinshi” spektaklinde Bazarbay, S.Balġabaevtiń “Qız jigirmaǵa shıqqanda” spektaklinde Táwken, “Eń shıraylı kelinshek” spektaklinde Jiyenbay, M.Xojanovtıń “Kosmostan kelgen qonaqlar” spektaklinde Aney, “Batır haqqında ertek” spektaklinde Duwaxan, “Mártlik hám jawızlıq” spektaklinde ertekshi áke, T.Qayıpbergenovtıń “Xeops piramidası” spektaklinde Qatpa, “Sahra búlbili” spektaklinde Sawdager áke,A.Sultanovtıń “Watan topraġı” spektaklinde Faxruddin, “Nahaqtan tógolgen qan” spektaklinde Zelenskiy, G.Tursınovtıń “Sabır túbi – sarı altın” spektaklinde Kóshe aqsaqalı, “Sınaq” spektaklinde Shinġız, Sh.Shamanadzenniń “Anajan” spektaklinde jolawshı, A.Allamuratovtıń “Jip úzilgende” spektakinde Maqset Qosekeev, J.Maxmudovtıń “Jalańash patsha” spektaklinde Tuk, Q.Narqabıldıń “Almaqtıń bermegi bar” spektaklinde Hikmet ata, V.Rozovtıń “Baxıt izlep” spektaklinde Kolya, Z.Sagalovtıń “Djonnidiń urlanıwı”spektaklinde Semmi, N.Osipovtıń “Sıyqırlı dáne” spektaklinde Areg bay, I.Yuzeevtiń “Oyınnan oymaq shıǵar” spektaklinde Evaris, I.Shtoktiń “Jaratqannıń deregi” spektaklinde Perishte, M.Aġamurzaev hám L.Babaxanovtıń “Jolbarıs hám mergen” spektaklinde Qaraqulaq hám Darvish, Q.Xalmuratovtıń “Kewil sayası” spektaklinde Reypnazar, “Jaza” spektaklinde Baltabek, “Jolbarıstıń ármani”spektaklinde Áke,Q.Mátmuratovtıń “Kempirge talas” spektaklinde Seytjan ǵarrı, S.Jumaġulovtıń “Kúyewindi berip tur” spektaklinde Jádiger, “Ekstrasens” spektaklinde Miliciya kapitani, Shekspirdiń “Romeo hám Juletta” spektaklinde Monteki hám basqa da kóplegen spektakllerde rol atqarıp, xalqımızdıń júrek tórinen tereń orın iyelegen.
Filmlerde atqarġan rolleri
Ustaz aktyor J.Abdimovtiń qaraqalpaq kino salasında da ornı girewli. Ol usı kúnge shekem “Qaraqalpaqfilm” kinostudiyası tárepinen súwretke alınġan “Qońsılar”, “Urı”, “Oqılmaġan xat”, “Kurort” hám “Ájiniyaz” filmlerinde rollerge súwretke túsip, kámine keltirip atqarġan.
Al háwesker kinostudiyalar tárepinen súwretke alınġan filmlerden bolsa, “Civilizaciya”, “Anası súymegen kempir” “Yapırmay” hám “Em bolsın” kino komediyalarında súwretke túsken.
Shańaraġı
Kino hám teatr saxnasınıń pidayı aktyorı J.Abdimov ómirlik joldası menen 2 ul, 3 qızdı tárbiyalap, búgingi kúnde 18 aqlıqtıń ádiwli ata-ájeleri. Úlgili shańaraq.
Óz gezeginde tájriybeli aktyor J.Abdimovtıń shańaraġına amanlıq, ózine zor densawlıq hám aldaġı dóretiwshilik jumıslarında elede bálent párwazlar tileymiz.
📝Tayarlaġan: “Qaraqalpaqfilm” kinostudiyası málimleme xızmeti