🗒Búgingi rubrikamız arqalı Qaraqalpaqstan Respublikasına xızmet kòrsetken artist, Qaraqalpaq màmleketlik jas tamashagóylar teatrı aktrisa hàm rejissyorı Roza Piyazova haqqında sóz etemiz.
Tàjriybeli aktrisa hàm teatr rejissyorı Roza Piyazova 1965-jıl 13-oktyabr kúni Nókis qalasında dúnyaģa kelgen. Milleti qazaq, ruwı: Álim-jolshara. Roza Piyazova: “Màdeniyat hám kórkem óner tarawına degen qızıġıwshılıġım, kásibime degen muxabbatım àkem Ózbekistan hàm Qaraqalpaqstan Respublikasına xızmet kórsetken artist Zinel Piyazovtan ótken” dep óz intervyularında bayan etken. Balalıġınan úlken saxnalarda rol oynawdı arzıw etken aktrisa, 1971-jılı Nókis qalasındaģı 4-sanlı orta mektepke tuńġısh qádemlerin qoyġan hàm 1977-jılı Nókis muzikalıq mektebiniń ,,Ayaq oyın” bólimine oqıwģa kiredi. Ulıwma orta mektepti tamamlaģannan soń, 1983-jılı Tashkent kórkem óner institutınıń ,,Quwırshaq teatr aktyorı” bólimine oqıwģa tapsırıp, 1986-jılı oqıwdı tabıslı tamamlaġan.
Arzıwlar qanatın elede en jayıwdı maqset etken aktrisa quwırshaq teatrına jumısqa kirip, 12 jıl dawamında pidayı jumıs islegen.
Tınıp-tınshımas insan elede dóretiwshiligin hár tárepleme rawajlandırıw, ózinde túrli rollerde sınap kóriw maqsetinde paytaxtımızdaġı Qaraqalpaq mámleketlik jas tamashagóyler teatrına jumısqa kirip, házirgi waqıtqa shekem teatr aktrisası bolıp tabıslı jumıs islep kelmekte.
Filmlerde atqarġan rolleri
R.Piyazova dóretiwshiligi dawamında Respublika kólemindegi oģada kóplegen spektakl hàm kinofilmlerde rol atqarıp, tamashagóylerdiń qálbinen tereń orın alıp úlgerdi.
Atap aytqanda: “Qaraqalpaqfilm” kinostudiyası tárepinen súwretke alınġan filmlerden “Qaysar”, hám “Teńiz”, kórkem filmlerinde,sonday-aq,”Àjiniyaz” kórkem publicistikalıq filminde tabıslı rol atqarġan.
Eń quwanıshlısı,”Sunday” filminde bas rolde oynap,”Eń jaqsı rol atqarġan aktrisa” nominaciyası menen sıylıqlanġan hám bul film dúnya tán alġan kinofilmlerdiń biri boldı. Sebebi, Yaponiyada ótkerilgen “Skip City International D-Cinema” festivalında, “Gran-pri” menen sıylıqlanıp,Qırġızstan,India, Franciya,Turkiya hàm Azerbayjan respublikalarında “Eń jaqsı kino” nominaciyasın da qolġa kirgizgen.
Qaraqalpaq xalqınıń súyikli aktrisası Roza Piyazovanıń qaraqalpaq teatr hàm kino tarawına qosqan úlesi girewli. Aktirsa xalqımızdıń júrek tórinen tereń orın alıp, pidayı xızmetleri ushın màmleketimiz tàrepinen “Qaraqalpaqstan Respublikasına xızmet kórsetken artist” “Mádeniyat pidayısı” kókirek belgileri menen xoshametlengen.
Miynet jolı 37 jıl.
Usı jıllar dawamında oynaġan spektaklleri, “Buratino” spektaklinde Buratino, “Bir qızġa tórt ashıq”ta Sajda, “Qarakóz”de Tekti, “Qıymayman”da Larisanıń anası,hayal hàm sudya, “Watan topraģı”nda kempir, “Sıyqırlı dàn”de qoyan, “Qız jigirmaġa shıqqanda” spektaklinde Jipek , “Màrtlik hàm jawızlıq”ta jalmawız kempir, “Baxtım meniń perzentim”de tùlki , “Muxabbatım ómirim”de Zlixa, “Ùydegi gáp kóshede”spektaklinde Rano, “Qorqıt ata”da perishte hàm bunnan da basqa kóplegen spektakllerde ózine tapsırılġan rollerdi kámine keltirip, atqarıp kelmekte.
R.Piyazova tek ġana aktrisa emes bálkim rejissura tarawında da bir qatar jumıslardı ámelge asırġan.
Saxnalastırgʻan spektaklleri;
“Saġındım” teatrlastırılgʻan shou, “Togʻaydaġı bayram”, “Erkebaydıń qılıģı”, “Ońımdaġı túsim”, “Salpan qulaqlar”, “Úsh erinshek” xalq erteklerin saxnalastırıp,2010-jıldan 2015-jıllar aralıģında “Jańa jıl” tamashalarında rejissyorlıq etken.
Shańaraģı
Talantlı aktrisa 25 jasında teleradio rejissyorı Elmurat Esemuratov penen turmıs qurġan. Búgingi kúnde ómirlik joldası menen 2 ul, 1 qızdı tàrbiyalap, 3 aqlıqtıń àdiwli ata-ájeleri. Ùlgili shańaraq.
Usı orında siz hám biz súygen aktrisa Poza Piyazovanıń shańaraģına amanlıq, òzine bekkem densawlıq hám aldaģı dóretiwshilik jumıslarına elede bálent párwazlar tilep qalamız.
Xalqımızdıń mehir hám muxabbatına bólenip júre beriwńizge isenimimiz kámil.
📝Tayarlaģan: “Qarqalpaqfilm” kinostudiyası málimleme xızmeti.