Búgingi rubrikamız arqalı, Qaraqalpaqstan Respublikasına xızmet kòrsetken artist, Berdaq atındaģı Qaraqalpaq mámleketlik akademiyalıq muzikalı teatrı vokal artisti Kópjúrsin Allanazarov Aymuratovich haqqında sóz etemiz.
Kino hám saxna pidayısı
Búgingi kúnde qaraqalpaq xalqınıń súyikli aktyorına aylanġan Kópjúrsin Allanazarov 1982-jılı Tashkent qalasında dúnyaġa kelgen. Ol Nókis qalalıq 16-sanlı orta mektepte tálim alġan. Milleti qaraqalpaq
Ol Tashkent mámleketlik kórkem óner institutınıń magistratura bólimin 2007-jılı tabıslı juwmaqlaġan hám sol jıldan baslap, teatrda óziniń dóretiwshilik miynet jolın
baslaġan. Sonday-aq, házirgi kúnge shekem Berdaq atındaģı Qaraqalpaq mámleketlik akademiyalıq muzikalı teatrı vokal artisti bolıp jemisli jumıs islep kelmekte.
Qaysı filmlerde rol atqarġan?
Usı dáwir ishinde aktyorlıq sheberligi, jaģımlı dawısı, lirik atqarıw sheberligi menen óz ıqlasbentlerine iye bolıp úlgerdi.
Ol tek ġana teatrda saxnalastırılģan spektakllerde emes, bálkim bir qansha filmlerge súwretke túsip, búgingi kúnde proffesional kino aktyor dárejesine jetti.
Atap aytqanda, “Qaraqalpaqfilm” hám “Ózbekfilm” studiyaları tárepinen súwretke alınġan “Ájiniyaz”, “Qalqan”, “Ústirtke jol”, “Teńiz”, “Duzaq”, “Bir dostıń bolsın”, “Mehir kózi”, filmlerinde túrli xarakterdegi róllerdi atqarıp, tamashagóylerdiń júreginde úlken iz qaldırdı.
Aktyor xalıqaralıq masshtabtaġı filmge túsiw ushın “Ispan” tilin bir ayda úyrengen…
Eń maqtanıshlısı, Kópjúrsin Allanazarov Turkiya qalasında súwretke alınġan “Ullı Amir hám Donna Mariya” xalıqaralıq masshtabtaġı filmde bas rollerdiń birin atqarıp, usı jılı filmniń úlken premyerası ótkeriliwi rejelestirilgen. Álbette bul filmge súwretke túsiw úlken juwapkershilikti talap etken hám bir aydıń ishinde ispan tilin úyreniwge sebepshi bolġan.
Qalaberse, K.Allanazarov teatr toparı menen turaqlı tárizde dóretiwshilik saparda bolıp, dala miynetkeshleri, mektep, licey hám student jaslar menen dóretiwshilik ushrasıwlar ótkerip ġana qoymastan, Respublikamız kólemindegi “Ġárezsizlik”, “Nawrız” hám ulıwma xalıqlıq bayramlardıń belsene qatnasıwshısı. Tájriybeli hám talantlı aktyordıń jemisli miynetleri ushın, 2022-jılı Qaraqalpaqstan Respublikasına xızmet kórsetken artist húrmetli ataġı menen xoshametlengen.
K.Allanazarov óz ústinde izleniwsheń, jámiyette húrmetke ılayıq úlgili insan. Shańaraqlı. 1 perzenttiń ádiwli ákesi, súyikli yar.
Óz gezeginde K. Allanazarovqa joqarı párwaz hám dóretiwshiliginde tasqın tabıslar tileymiz.
Tayarlaġan: “Qaraqalpaqfilm” kinostudiyası málimleme xızmeti